છોટાઉદેપુર જિલ્લાના બોડેલી ખાતે રાષ્ટ્રભક્તિના મંગલમય વાતાવરણમાં ૭૭માં પ્રજાસત્તાક પર્વની જિલ્લા કક્ષાની ભવ્ય ઉજવણી કરવામાં આવી હતી. આ અવસરે રાજ્યના મહિલા અને બાળ કલ્યાણ તથા સામાજિક ન્યાય અને અધિકારીતા વિભાગના રાજ્યમંત્રી ડૉ. મનિષાબેન વકીલ દ્વારા ગરિમાપૂર્ણ ધ્વજવંદન કરી ત્રિરંગાને સલામી આપવામાં આવી હતી.આ પ્રસંગે વિવિધ ક્ષેત્રોમાં ઉત્કૃષ્ટ કામગીરી કરનાર કર્મયોગીઓને સન્માનિત કરવામાં આવ્યા હતા
નિશુલ્ક આયુષ્માન કાર્ડ કામગીરી બદલ વિશિષ્ટ સન્માન
આ ગૌરવભર્યા સમારોહમાં નવજીવન હાઈસ્કૂલ, અલીપુરા (બોડેલી)માં કાર્યરત શિક્ષિકા તેજલબેન એન. પંચાલને તેમની અનન્ય સેવાકીય કામગીરી બદલ વિશેષ સન્માન એનાયત કરવામાં આવ્યું હતું. તેજલબેને શાળા પરિસર તેમજ ગ્રામ્ય વિસ્તારોમાં જરૂરિયાતમંદ વિદ્યાર્થીઓ અને ગરીબ પરિવારો માટે નિષ્ઠાપૂર્વક નિશુલ્ક આયુષ્માન કાર્ડ કઢાવી આપવાની નોંધપાત્ર કામગીરી કરી છે. તેમના પ્રયત્નોથી અનેક ગરીબ પરિવારોને ગંભીર બીમારીના સમયે તાત્કાલિક અને નિશુલ્ક આરોગ્ય સેવાઓ પ્રાપ્ત થવાની સુવિધા સુનિશ્ચિત બની છે.
રાજ્યકક્ષાના મંત્રી ડો. મનીષાબેન વકીલની ઉપસ્થિતિમાં વહીવટી તંત્ર દ્વારા પ્રમાણપત્ર આપી બહુમાન
ગુજરાત સરકારના માનનીય મંત્રી ડો. મનીષાબેન વકીલની પ્રેરક ઉપસ્થિતિમાં જિલ્લા વહીવટી તંત્ર દ્વારા તેજલબેન પંચાલને પ્રમાણપત્ર આપી સન્માનિત કરવામાં આવ્યા હતા. આ અવસરે જિલ્લા કક્ષાના ઉચ્ચ અધિકારીઓ, કર્મચારીઓ તથા મહાનુભાવોએ તેમની સામાજિક જવાબદારી, સેવાભાવના અને કર્તવ્યનિષ્ઠાની ખુલ્લા દિલે પ્રશંસા કરી હતી.
શાળા પરિવાર અને ગ્રામ્ય વિસ્તાર માટે ગૌરવની ક્ષણ
શિક્ષિકા તેજલબેન પંચાલની આ સિદ્ધિ બદલ નવજીવન હાઈસ્કૂલના આચાર્ય એકનાથ જાધવ સહિત સમગ્ર શાળા પરિવારએ હર્ષ અને ગૌરવની લાગણી વ્યક્ત કરી હતી. શિક્ષણ સાથે સાથે આરોગ્ય ક્ષેત્રે જાગૃતિ ફેલાવવાના તેમના સતત પ્રયાસો ગ્રામ્ય વિસ્તાર માટે પ્રેરણારૂપ બન્યા છે. તેમની આ કામગીરીએ સાબિત કર્યું છે કે શિક્ષક માત્ર શિક્ષણ પૂરતા સીમિત ન રહી સમાજના સર્વાંગી વિકાસમાં પણ મહત્વપૂર્ણ ભૂમિકા ભજવી શકે છે.આ રીતે, ૭૭મા પ્રજાસત્તાક પર્વની ઉજવણી માત્ર ઉત્સવ પૂરતી સીમિત ન રહી, પરંતુ સેવાભાવ, માનવતા અને સામાજિક જવાબદારીના ઉત્તમ ઉદાહરણ તરીકે યાદગાર બની રહી હતી.
સલમાન મેમણ, એડિટર ઈન ચીફ
(જાણશે ગુજરાત સાપ્તાહિક અખબાર અને ડિજિટલ)
