બોડેલી,
નવમી ડિસેમ્બરના રોજ છોટાઉદેપુર જિલ્લામાં છોટાઉદેપુર બોડેલી રોડ પર તોરલ હોટલની સામેના ઢાબામાં એક કાર બેસુમાર સ્પીડે ઘૂસી આવી હતી. સદનસીબે આ ઘટનામાં કોઈ જાનહાનિ થઈ ન હતી, પરંતુ ઢાબામાં જમતા ત્રણ જણને કારની ટક્કરથી ઇજા થઈ હતી અને ઢાબાને નુકસાન થયું હતું. આ ઇજાગ્રસ્તોએ બોડેલીના રહેવાસી અને આ ચાલક વિશાલ ઠક્કર સામે વાહન ગફલતભરી રીતે ચલાવીને ઇજા પહોંચાડવા બદલ પોલીસ ફરિયાદ નોંધાવી છે. ઢાબામાં બેઠેલા ત્રણેયને એસયુવીની ટક્કર પછી નજીકની ખાનગી હોસ્પિટલમાં સારવાર માટે લઈ જવાયા હતા અને ફ્રેક્ચર કે કોઈ ગંભીર ઇજા ન હોઈ ટૂંકી સારવાર બાદ રજા આપી દેવામાં આવી હતી. ફરિયાદ નોંધાયા પછી પોલીસે આરોપી કાર ચાલક વિશાલ ઠક્કરની અટકાયત કરી આગળની વધુ તપાસ હાથ ધરી છે