અમદાવાદના વટવા GIDCમાં ભીષણ આગ લાગી છે. ફાયર બ્રિગેડની 13 ગાડીઓ ઘટનાસ્થળે પહોંચી ગઈ છે. વટવા GIDCના ફેઝ-1માં પ્લોટ નંબર 123-124માં આગ લાગી હતી. અલ્કેશ એન્ટરપ્રાઇઝ નામના યુનિટમાં આગ લાગી હતી. ગોડાઉનમાં આગ લાગતા જ આસપાસના વિસ્તારોમાં અફરાતફરીનો માહોલ સર્જાયો છે. તેમજ દૂર દૂર સુધી ધુમાડાના ગોટે ગોટે જોવા મળ્યા હતા. સોલવન્ટ નામના કેમિકલનો ઉપયોગ થતો હોવાથી વધુ વાહનોને તૈયાર રહેવા સૂચના આપવામાં આવી છે. રોડ પર પોલીસ કાફલો પણ તૈનાત કરવામાં આવ્યો છે.
સ્થાનિક લોકોએ ફાયર વિભાગને જાણ કરતાં જ ફાયર બ્રિગેડની 11 ગાડીઓ અને 6 અધિકારીઓ ઘટનાસ્થળે પહોંચી ગયા હતા. વેરહાઉસમાં લાગેલી ભીષણ આગને ઓલવવાના પ્રયાસો હાથ ધરાયા હતા. જોકે ફાયર વિભાગ દ્વારા ભારે જહેમત બાદ આગ પર કાબુ મેળવ્યો હતો. પ્રાપ્ત માહિતી અનુસાર, આગના કારણે કોઈ જાનહાનિના સમાચાર નથી.બીજી તરફ પાટણના સિદ્ધપુરમાં ગઈકાલે એક મકાનમાં આગ લાગી હતી. જેના કારણે આસપાસના વિસ્તારમાં અફરાતફરીનો માહોલ સર્જાયો હતો. ઘરમાં લાગેલી આગમાં એક બાળક અને એક વૃદ્ધનું મોત થયું હતું. પ્રાપ્ત માહિતી અનુસાર, તિરુપતિ નગર સ્થિત મકાનમાં શોર્ટ સર્કિટના કારણે આગ લાગી હોવાનું અનુમાન લગાવવામાં આવી રહ્યું છે. જે બાદ ફાયર વિભાગ દ્વારા આગને કાબુમાં લેવામાં આવી હતી.