વડોદરા
ભરૂચના ઝઘડીયામાં 10 વર્ષની બાળકી પર બળાત્કાર ગુજાર્યા બાદ બાળકી વડોદરાની સયાજી હોસ્પિટલમાં સારવાર હેઠળ હતી. પરંતુ આ છોકરી જીવનની લડાઈ હારી ગઈ છે. બળાત્કારના આઠમા દિવસે બાળકીનું મૃત્યુ થયું હતું. તબીબોએ બાળકીને બચાવવા માટે અથાગ પ્રયત્નો કર્યા પરંતુ આજે સાંજે બાળકીએ જીવ ગુમાવ્યો હતો.
મળતી માહિતી અનુસાર, છેલ્લા બે દિવસમાં બાળકીને ત્રણ બોટલ લોહી ચડાવવામાં આવ્યું હતું. બાળકીને બાળરોગ વિભાગમાં દાખલ કરવામાં આવી હતી જ્યાં તેની બે વખત સર્જરી કરવામાં આવી હતી. પરંતુ યુવતીને હોશ ન આવ્યો.
GIDCમાં આવેલી શ્રમજીવી વસાહતમાં 16 ડિસેમ્બરે 10 વર્ષની બાળકી ઉપર દુષ્કર્મની ઘટના બની હતી. પડોશમાં રહેતા જ ઝારખંડના આરોપી વિજય પાસવાને કુમળી બાળકીને પીંખી નાખી હતી. દુષ્કર્મ પહેલા વિજય પાસવાને બાળકીના મોઢા ઉપર પથ્થરથી વાર કરીને લોહી લુહાણ કરી નાખી હતી અને પીડિતાના ગુપ્તાંગમાં સળીયો નાખીને ગંભીર ઈજાઓ પહોંચાડી હતી. બાળકીની હાલત ગંભીર હોવાથી વડોદરાની એસએસજી હોસ્પિટલમાં સારવાર ચાલી રહી હતી. સમગ્ર મામલે પોલીસે આરોપીની ધરપકડ કરી લીધી હતી.
આપને જણાવી દઈએ કે, આરોપીએ બાળકી પર દુષ્કર્મ આચર્યા બાદ તેના ગુપ્તાંગમાં લોખંડનો સળિયો નાખી ક્રૂરતાની હદ વટાવી હતી. જેના લીધે બાળકીને ગંભીર ઈજાઓ પહોંચી હતી. આ નરાધમે એક મહિના અગાઉ પણ બાળકી પર દુષ્કર્મ આચર્યું હતું. જો કે, સમાજમાં આબરૂ જવાની બીકે મા-બાપે કોઈ પોલીસ ફરિયાદ કરી ન હતી, જેના લીધે આરોપીની હિંમત વધી અને બીજીવાર બાળકી પર દુષ્કર્મ આચર્યું હતું. કેસની ગંભીરતા જોતાં તપાસ માટે એક વિશેષ ટીમ બનાવવામાં આવી હતી. સાથે જ આરોપીને કડકમાં કડક સજા થાય તે માટેની કાયદાકીય પ્રક્રિયા ચાલી રહી છે.