રાજકોટ
રાજકોટના મેટોડા GIDCમાં ગોપાલ નમકીનની ફે્ક્ટરીમાં ભીષણ આગ લાગ્યા બાદ પોલીસ ઘટના સ્થળે પહોંચી ગઈ હતી. કંપની મેનેજરના જણાવ્યા અનુસાર તેમની કંપનીમાં દરરોજ 400-500 કર્મચારીઓ હાજર રહે છે, જો કે આજે બુધવારે રજા હોવાથી કર્મચારીઓની સંખ્યા રોજ કરતાં ઓછી હતી. આ આગના કારણે 1 કિમી દૂરથી ધુમાડાના ગોટેગોટા જોવા મળી રહ્યા હતા અને ફેક્ટરીની આસપાસના વિસ્તારોમાં લોકોના ટોળા એકઠા થઈ ગયા હતા. પ્રોડક્શન યુનિટમાં ટીન-તેલ, વેફર્સ અને પાપડનો જથ્થો હોવાથી આગ લાગવાની શક્યતા છે.
આ ભીષણ આગને જોતા રાજકોટ અને આસપાસના તાલુકાઓમાંથી ફાયર બ્રિગેડની ટીમોને પણ ઘટનાસ્થળે બોલાવવામાં આવી હતી. આ ઉપરાંત ખાનગી ટેન્કરો પણ દોડાવવાની ફરજ પડી હતી. આગની ઘટનામાં ત્રણ લોકોને નાની મોટી ઈજાઓ થઈ હોવાનું સામે આવ્યું છે. હજુ સુધી કોઈ જાનહાનિના સમાચાર નથી.
આગની જાણ થતા રાજકોટ ફાયર બ્રિગેડની ટીમ ઘટના સ્થળે પહોંચી આગને કાબુમાં લેવાના પ્રયાસો શરૂ કર્યા હતા જો કે ફેક્ટરીમાં પુષ્કળ પ્રમાણમાં બોક્સ અને પ્લાસ્ટીકની થેલીઓ હોવાથી આગ ભભુકી રહી હોય તેવું લાગી રહ્યું છે. ફાયર બ્રિગેડ દ્વારા આગ પર કાબુ મેળવવાના પ્રયાસો હાથ ધરાયા છે. ગોપાલ નમકીનના મેનેજરે કહ્યું કે અમારી કંપનીમાં 400-500 કર્મચારીઓ છે. ફાયર બ્રિગેડની ટીમ આગ પર કાબૂ મેળવવા કામે લાગી છે. હજુ સુધી અંદર કોઈ ફસાયું હોવાની કોઈ માહિતી નથી.
ફેક્ટરીમાં વેફર, ફ્રાઇમ્સ, પાપડ જેવી વસ્તુઓનું ઉત્પાદન અને પેકિંગ થતાં હોવાથી મોટા પ્રમાણમાં પૂઠાંનાં બોક્સ, તેલ, અને પ્લાસ્ટિકનો જથ્થો પડેલો હોય છે. આ તમામ વસ્તુઓના કારણે જ આગે ગણતરીની મિનિટોમાં વિકરાળ સ્વરૂપ ધારણ કર્યાનું અનુમાન છે, જોકે આગ લાગ્યાનું કારણ તપાસ બાદ જ સામે આવશે.
રાજકોટના મેટોડા GIDCમાં આવેલ ગોપાલ નમકીન યુનિટમાં કુલ 5 માળ છે. 5 માળની આ બિલ્ડીંગમાં સોલ્ટ મેકિંગ યુનિટમાં આગ લાગ્યા બાદ બે કલાકથી સતત પાણીનો વરસાદ ચાલુ રાખવામાં આવ્યો. આગ પર કાબૂ મેળવવા માટે તમામ શક્ય પ્રયાસો કરવામાં આવી રહ્યા છે. ફાયર બ્રિગેડની સાથે ગોપાલ નમકીન ખાતે કામ કરતા કર્મચારીઓ પણ આગને કાબુમાં લેવા પ્રયાસ કરી રહ્યા છે. આગને કાબુમાં લેવા માટે ફાયર બ્રિગેડના જવાનોએ બારીઓના કાચ તોડીને ચારે બાજુથી પાણીનો છંટકાવ કરી રહ્યા છે. સતત બે કલાકથી આગ પર કાબૂ મેળવવાના પ્રયાસો ચાલી રહ્યા છે, હજુ સુધી આગ પર કાબૂ મેળવવામાં આવ્યો નથી અને આગની ગંભીર પ્રકૃતિને જોતા આગ પર કાબૂ મેળવવામાં સમય લાગી શકે છે, જો કે હાલ આગ પર કાબૂ મેળવવો શક્ય નથી. તે જાણવું મુશ્કેલ છે
ફેક્ટરીમાં આગ ગંભીર બનતા મેજર કોલ જાહેર કરાયો છે. રાજકોટ ઉપરાંત આજુબાજુના તાલુકાઓમાંથી પણ ફાયર બ્રિગેડની ટીમો ઘટનાસ્થળે પહોંચી ગઈ છે, પરંતુ ભીષણ આગના કારણે આસપાસના વિસ્તારોમાંથી ખાનગી પાણીના ટેન્કરો મંગાવી પાણી ઠાલવવામાં આવી રહ્યું છે.
રાજકોટના મેટોડા GIDCમાં આવેલી ફેક્ટરી આજે બુધવારની રજા હોવાના કારણે બંધ છે, જેના કારણે આજે ગોપાલ નમકીનમાં કામદારોની સંખ્યા પણ ઓછી હતી. થોડા મજૂરો જ હતા. પોલીસના જણાવ્યા અનુસાર હજુ સુધી કોઈ જાનહાનિના સમાચાર નથી. તમામ લોકોને સુરક્ષિત બહાર કાઢવામાં આવ્યા છે. કહેવામાં આવ્યું છે કે હાલ સ્થિતિ નિયંત્રણમાં છે.